Hongtin Tsok-gia̍p bāng

   恁攏按呢，無講一聲，著由在恁來來去去。抑袂相借問。

「咚！」一聲，我著愛惦惦仔，接受恁佇我个身軀上所做个一切。

雖罔，我生做無真水，無五光十色个光采，亦無妖嬌美麗个身材，

總是，袂因為外表來怨嘆。

佇世間上，有真儕代誌是比外表閣卡重要矣，甘毋是咧？

惦惦徛咧遮，看恁來來去去，一工閣一工、一冬又一冬。

有个人，真溫柔，對我總是真好禮閣細義，從來毋捌對我粗魯piàn-piàn。

有个人，著沒這呢好禮，沒講一句，著青彩污染我純潔个身軀。

    若是好天，我个心情嘛會好閣親像出日頭！

看著恁踏著輕鬆个腳步，妝予水水、閣點胭脂，袂輸欲嫁尪咧！

若是歹天……喔！我著知苦囉！歸腹內个lō-kô muâinn-á，

人人看，人人嫌，連我家己嘛無敢照鏡！

『一年有365工，四季是春夏秋冬；看恁逐个袂輸蜈蚣，逐擺穿來攏無仝。』

我偷偷塊看，看恁今仔日閣欲展啥乜法寶出來。

我尚愛看青春姑娘个穿tshah，合身个水衫，短短个褲、裙，

有个穿娃娃鞋，有个穿峘踏鞋，閣有sia̍p-phânn个〝馬靴〞。

尚界歡喜，看著恁共這水水个鞋，安心矣交代予我。

毋閣，我尚無甲意个鞋款，我想應該著是──tshan-thua啦。

我有閣朋友討論過，阮發現著厝漢尚愛穿〝藍白slipa〞，

he真正是世界bái个bái neh。

若是我身軀內有放一雙藍白slipa，一定會予同行恥笑歸落工。

        雖然，我毋捌講話，亦真憨慢講話，

        但是，我做人是真實在。

        毋管透風落雨，山崩亦是地動；

        我猶原老神在在，徛佇這──等汝。

 



使用修辭：譬喻、摹寫、感嘆、設問、排比